अथ अष्टमोऽध्यायः
त्वद्यात्रया व्यापकता हता ते ध्यानेन चेतःपरता हता ते । स्तुत्या मया वाक्परता हता ते क्षमस्व नित्यं त्रिविधापराधान् ॥ १॥
tvad yatraya vyapakata hata te dhyanena chetah parata hata te । stutya maya vakparata hata te kshamasva nityam trividha aparadhan ॥
कामैरहतधीर्दान्तो मृदुः शुचिरकिञ्चनः । अनीहो मितभुक् शान्तः स्थिरो मच्छरणो मुनिः ॥ २॥
kamair ahatadhir danto mriduh shuchir akinchanah । aniho mitabhuk shantah sthiro machchharano munih ॥
अप्रमत्तो गभीरात्मा धृतिमान् जितषड्गुणः । अमानी मानदः कल्पो मैत्रः कारुणिकः कविः ॥ ३॥
apramatto gabhiratma dhritiman jitashadgunah । amani manadah kalpo maitrah karunikah kavih ॥
कृपालुरकृतद्रोहस्तितिक्षुः सर्वदेहिनाम् । सत्यसारोऽनवद्यात्मा समः सर्वोपकारकः ॥ ४॥
kripalur akritadrohas titikshuh sarvadehinam । satyasaro anavadyatma samah sarvopak arakah ॥
अवधूतलक्षणं वर्णैर्ज्ञातव्यं भगवत्तमैः । वेदवर्णार्थतत्त्वज्ञैर्वेदवेदान्तवादिभिः ॥ ५॥
avadhutalakshanam varnair jnatavyam bhagavatt amaih । vedavarnarthatattvajnair vedavedantavadibhih ॥
आशापाशविनिर्मुक्त आदिमध्यान्तनिर्मलः । आनन्दे वर्तते नित्यमकारं तस्य लक्षणम् ॥ ६॥
ashapashavinirmukta adimadhyantanirmalah । anande vartate nityam akaram tasya lakshanam ॥
वासना वर्जिता येन वक्तव्यं च निरामयम् । वर्तमानेषु वर्तेत वकारं तस्य लक्षणम् ॥ ७॥
vasana varjita yena vaktavyam cha niramayam । vartamaneshu varteta vakaram tasya lakshanam ॥
धूलिधूसरगात्राणि धूतचित्तो निरामयः । धारणाध्याननिर्मुक्तो धूकारस्तस्य लक्षणम् ॥ ८॥
dhulidhusara gatrani dhutachitto niramayah । dharanadhyananirmukto dhukaras tasya lakshanam ॥
तत्त्वचिन्ता धृता येन चिन्ताचेष्टाविवर्जितः । तमोऽहंकारनिर्मुक्तस्तकारस्तस्य लक्षणम् ॥ ९॥
tattvachinta dhrita yena chintacheshtavivarjitah । tamo ahankaranirmuktas takaras tasya lakshanam ॥
दत्तात्रेयावधूतेन निर्मितानन्दरूपिणा । ये पठन्ति च शृण्वन्ति तेषां नैव पुनर्भवः ॥ १०॥
dattatreyavadhutena nirmitanandarupina । ye pathanti cha shrunvanti tesham naiva punarbhavah ॥
इति अष्टमोऽध्यायः ॥ ८॥