अथ षष्ठमोऽध्यायः
बहुधा श्रुतयः प्रवदन्ति वयं वियदादिरिदं मृगतोयसमम् । यदि चैकनिरन्तरसर्वशिव- मुपमेयमथोह्युपमा च कथम् ॥ १॥
bahudha shrutayah pravadanti vayam viyadadir idam mrigatoyasamam । yadi chaikanirantarasarvashivam upameyam athohy upama cha katham ॥ 1॥
अविभक्तिविभक्तिविहीनपरं ननु कार्यविकार्यविहीनपरम् । यदि चैकनिरन्तरसर्वशिवं यजनं च कथं तपनं च कथम् ॥ २॥
avibhaktivibhaktivihinaparam nanu karyavikaryavihinaparam । yadi chaikanirantarasarvashivam yajanam cha katham tapanam cha katham ॥ 2॥
मन एव निरन्तरसर्वगतं ह्यविशालविशालविहीनपरम् । मन एव निरन्तरसर्वशिवं मनसापि कथं वचसा च कथम् ॥ ३॥
mana eva nirantarasarvagatam hy avishalavishalavihinaparam । mana eva nirantarasarvashivam manasapi katham vachasa cha katham ॥ 3॥
दिनरात्रिविभेदनिराकरण- मुदितानुदितस्य निराकरणम् । यदि चैकनिरन्तरसर्वशिवं रविचन्द्रमसौ ज्वलनश्च कथम् ॥ ४॥
dinaratrivibhedanirakaranam uditanuditasya nirakaranam । yadi chaikanirantarasarvashivam ravichandramasau jvalanash cha katham ॥ 4॥
गतकामविकामविभेद इति गतचेष्टविचेष्टविभेद इति । यदि चैकनिरन्तरसर्वशिवं बहिरन्तरभिन्नमतिश्च कथम् ॥ ५॥
gatakamavikamavibheda iti gataceshtavicheshtavibheda iti । yadi chaikanirantarasarvashivam bahirantarabhinnamatish cha katham ॥ 5॥
यदि सारविसारविहीन इति यदि शून्यविशून्यविहीन इति । यदि चैकनिरन्तरसर्वशिवं प्रथमं च कथं चरमं च कथम् ॥ ६॥
yadi saravisaravihina iti yadi shunyavishunyavihina iti । yadi chaikanirantarasarvashivam prathamam cha katham charamam cha katham ॥ 6॥
यदिभेदविभेदनिराकरणं यदि वेदकवेद्यनिराकरणम् । यदि चैकनिरन्तरसर्वशिवं तृतीयं च कथं तुरीयं च कथम् ॥ ७॥
yadibhedavibhedanirakaranam yadi vedakavedyanirakaranam । yadi chaikanirantarasarvashivam tritiyam cha katham turiyam cha katham ॥ 7॥
गदिताविदितं न हि सत्यमिति विदिताविदितं न हि सत्यमिति । यदि चैकनिरन्तरसर्वशिवं विषयेन्द्रियबुद्धिमनांसि कथम् ॥ ८॥
gaditaviditam na hi satyam iti viditaviditam na hi satyam iti । yadi chaikanirantarasarvashivam vishayendriyabuddhimanamsi katham ॥ 8॥
गगनं पवनो न हि सत्यमिति धरणी दहनो न हि सत्यमिति । यदि चैकनिरन्तरसर्वशिवं जलदश्च कथं सलिलं च कथम् ॥ ९॥
gaganam pavano na hi satyam iti dharani dahano na hi satyam iti । yadi chaikanirantarasarvashivam jaladash cha katham salilam cha katham ॥ 9॥
यदि कल्पितलोकनिराकरणं यदि कल्पितदेवनिराकरणम् । यदि चैकनिरन्तरसर्वशिवं गुणदोषविचारमतिश्च कथम् ॥ १०॥
yadi kalpitalokanirakaranam yadi kalpitadevanirakaranam । yadi chaikanirantarasarvashivam gunadoshavicharamatish cha katham ॥ 10॥
मरणामरणं हि निराकरणं करणाकरणं हि निराकरणम् । यदि चैकनिरन्तरसर्वशिवं गमनागमनं हि कथं वदति ॥ ११॥
maranamarana hi nirakaranam karanakaranam hi nirakaranam । yadi chaikanirantarasarvashivam gamanagamanam hi katham vadati ॥ 11॥
प्रकृतिः पुरुषो न हि भेद इति न हि कारणकार्यविभेद इति । यदि चैकनिरन्तरसर्वशिवं पुरुषापुरुषं च कथं वदति ॥ १२॥
prakritih purusho na hi bheda iti na hi karanakaryavibheda iti । yadi chaikanirantarasarvashivam purushapurusham cha katham vadati ॥ 12॥
तृतीयं न हि दुःखसमागमनं न गुणाद्द्वितीयस्य समागमनम् । यदि चैकनिरन्तरसर्वशिवं स्थविरश्च युवा च शिशुश्च कथम् ॥ १३॥
tritiyam na hi duhkhasamagamanam na gunad dvitiyasya samagamanam । yadi chaikanirantarasarvashivam sthavirash cha yuva cha shishush cha katham ॥ 13॥
ननु आश्रमवर्णविहीनपरं ननु कारणकर्तृविहीनपरम् । यदि चैकनिरन्तरसर्वशिव- मविनष्टविनष्टमतिश्च कथम् ॥ १४॥
nanu ashramavarnavihinaparam nanu karanakarturavihinaparam । yadi chaikanirantarasarvashivam avinashitavinashitamatish cha katham ॥ 14॥
ग्रसिताग्रसितं च वितथ्यमिति जनिताजनितं च वितथ्यमिति । यदि चैकनिरन्तरसर्वशिव- मविनाशि विनाशि कथं हि भवेत् ॥ १५॥
grasitagrasitam cha vitathyam iti janitajanitam cha vitathyam iti । yadi chaikanirantarasarvashivam avinashi vinashi katham hi bhavet ॥ 15॥
पुरुषापुरुषस्य विनष्टमिति वनितावनितस्य विनष्टमिति । यदि चैकनिरन्तरसर्वशिव- मविनोदविनोदमतिश्च कथम् ॥ १६॥
purushapurushasya vinashtam iti vanitavanitasya vinashtam iti । yadi chaikanirantarasarvashivam avinodavinodamatish cha katham ॥ 16॥
यदि मोहविषादविहीनपरो यदि संशयशोकविहीनपरः । यदि चैकनिरन्तरसर्वशिव- महमत्र ममेति कथं च पुनः ॥ १७॥
yadi mohavishadavihinaparo yadi samshayashokavihinaparah । yadi chaikanirantarasarvashivam aham atra mameti katham cha punah ॥ 17॥
ननु धर्मविधर्मविनाश इति ननु बन्धविबन्धविनाश इति । यदि चैकनिरन्तरसर्वशिवं- मिहदुःखविदुःखमतिश्च कथम् ॥ १८॥
nanu dharmavidharmavinasha iti nanu bandhavibandhavinasha iti । yadi chaikanirantarasarvashivam iha duhkha viduhkhamatish cha katham ॥ 18॥
न हि याज्ञिकयज्ञविभाग इति न हुताशनवस्तुविभाग इति । यदि चैकनिरन्तरसर्वशिवं वद कर्मफलानि भवन्ति कथम् ॥ १९॥
na hi yajnikayajnavibhaga iti na hutashanavastuvibhaga iti । yadi chaikanirantarasarvashivam vada karmaphalani bhavanti katham ॥ 19॥
ननु शोकविशोकविमुक्त इति ननु दर्पविदर्पविमुक्त इति । यदि चैकनिरन्तरसर्वशिवं ननु रागविरागमतिश्च कथम् ॥ २०॥
nanu shokavishokavimukta iti nanu darpavidarpavimukta iti । yadi chaikanirantarasarvashivam nanu ragaviragamatish cha katham ॥ 20॥
न हि मोहविमोहविकार इति न हि लोभविलोभविकार इति । यदि चैकनिरन्तरसर्वशिवं ह्यविवेकविवेकमतिश्च कथम् ॥ २१॥
na hi mohavimohavikara iti na hi lobhavilobhavikara iti । yadi chaikanirantarasarvashivam hy avivekavivekamatish cha katham ॥ 21॥
त्वमहं न हि हन्त कदाचिदपि कुलजातिविचारमसत्यमिति । अहमेव शिवः परमार्थ इति अभिवादनमत्र करोमि कथम् ॥ २२॥
tvam aham na hi hanta kadachid api kulajativicharam asatyam iti । aham eva shivah paramartha iti abhivadanam atra karomi katham ॥ 22॥
गुरुशिष्यविचारविशीर्ण इति उपदेशविचारविशीर्ण इति । अहमेव शिवः परमार्थ इति अभिवादनमत्र करोमि कथम् ॥ २३॥
gurushishyavicharavishirna iti upadeshavicharavishirna iti । aham eva shivah paramartha iti abhivadanam atra karomi katham ॥ 23॥
न हि कल्पितदेहविभाग इति न हि कल्पितलोकविभाग इति । अहमेव शिवः परमार्थ इति अभिवादनमत्र करोमि कथम् ॥ २४॥
na hi kalpitadehavibhaga iti na hi kalpitalokavibhaga iti । aham eva shivah paramartha iti abhivadanam atra karomi katham ॥ 24॥
सरजो विरजो न कदाचिदपि ननु निर्मलनिश्चलशुद्ध इति । अहमेव शिवः परमार्थ इति अभिवादनमत्र करोमि कथम् ॥ २५॥
sarajo virajo na kadachid api nanu nirmalanishchalashuddha iti । aham eva shivah paramartha iti abhivadanam atra karomi katham ॥ 25॥
न हि देहविदेहविकल्प इति अनृतं चरितं न हि सत्यमिति । अहमेव शिवः परमार्थ इति अभिवादनमत्र करोमि कथम् ॥ २६॥
na hi dehavidehavikalpa iti anritam charitam na hi satyam iti । aham eva shivah paramartha iti abhivadanam atra karomi katham ॥ 26॥
विन्दति विन्दति न हि न हि यत्र छन्दोलक्षणं न हि न हि तत्र । समरसमग्नो भावितपूतः प्रलपति तत्त्वं परमवधूतः ॥ २७॥
vindati vindati na hi na hi yatra chandolaksanam na hi na hi tatra । samarasam agno bhavitaputah pralapati tattvam paramavadhutah ॥ 27॥
इति षष्ठमोऽध्यायः ॥ ६॥